शह-कटशहाचे राजकारणःमंत्री गोरेंच्या दाव्याने स्थानिक नेत्यांच्या रणनीतीला धक्का
सातारा/प्रतिनिधीः-
सातारा जिल्हा मध्यवर्ती सहकारी बँकेच्या अध्यक्षपदाची निवड आता केवळ सहकार क्षेत्रापुरती मर्यादित राहिलेली नाही. या पदावरून महायुतीतील राजकीय वर्चस्वाची लढाई उघड होऊ लागली आहे. स्थानिक नेत्यांच्या चर्चेतून अध्यक्षपदाचा निर्णय घेण्याच्या भूमिकेला ग्रामविकासमंत्री जयकुमार गोरे यांनी थेट मुख्यमंत्र्यांच्या अधिकाराचा मुद्दा उपस्थित करून नवे वळण दिले आहे. त्यामुळे जिल्ह्यातील महायुतीच्या नेत्यांमध्ये समन्वयाऐवजी दाव्यांची रस्सीखेच सुरू झाल्याचे चित्र आहे.
रहिमतपूर येथे माध्यमांशी बोलताना जयकुमार गोरे यांनी जिल्हा बँकेच्या अध्यक्षपदावर भाजपचा दावा स्पष्ट केला. बँकेच्या निवडणुकीत भाजपचे नऊ, राष्ट्रवादी काँग्रेसचे आठ आणि शिवसेनेचे चार संचालक निवडून आले आहेत. त्यामुळे संचालकांच्या संख्याबळात भाजप सर्वांत मोठा पक्ष ठरला आहे. या पार्श्वभूमीवर अध्यक्षपदाचा पहिला मान भाजपला मिळावा, अशी भूमिका त्यांनी मांडली. अध्यक्ष निवडीचे अंतिम अधिकार मुख्यमंत्री देवेंद्र फडणवीस यांच्याकडेच असल्याचेही त्यांनी ठामपणे सांगितले.
गोरे यांच्या या विधानाला विशेष राजकीय महत्त्व आहे. कारण यापूर्वी पालकमंत्री शंभूराज देसाई आणि सार्वजनिक बांधकाम मंत्री शिवेंद्रसिंहराजे भोसले यांनी अध्यक्षपदाचा निर्णय जिल्ह्यातील नेत्यांना विश्वासात घेऊन स्थानिक पातळीवरच करण्याची भूमिका मांडली होती. स्थानिक पातळीवर एकमत न झाल्यास मुख्यमंत्र्यांचा सल्ला घेतला जाईल, असे शिवेंद्रसिंहराजे यांनी स्पष्ट केले होते. तर प्रत्येक छोट्या निर्णयासाठी मुंबई गाठण्यापेक्षा जिल्ह्यातील नेत्यांनी एकत्र बसून तोडगा काढावा, असे आवाहन शंभूराज देसाई यांनी केले होते.
मात्र, गोरे यांनी निवडणुकीपूर्वीची प्रक्रिया आणि वरिष्ठ पातळीवर झालेल्या निर्णयांचा दाखला देत स्थानिक नेत्यांच्या भूमिकेपेक्षा मुख्यमंत्र्यांचा अधिकार महत्त्वाचा असल्याचे स्पष्ट केले. त्यामुळे अध्यक्षपदाच्या निवडीत स्थानिक नेतृत्वाचे कितपत चालणार आणि भाजपच्या संख्याबळाच्या दाव्याला मित्रपक्ष कितपत प्रतिसाद देणार, हा कळीचा प्रश्न निर्माण झाला आहे.
दरम्यान, राष्ट्रवादी काँग्रेसच्या अजित पवार गटाचे नेते तथा मदत व पुनर्वसन मंत्री मकरंद पाटील आणि विद्यमान अध्यक्ष खासदार नितीन पाटील यांनी अद्याप या वादावर जाहीर भूमिका मांडलेली नाही. त्यामुळे राष्ट्रवादीची भूमिका या सत्तासंघर्षात निर्णायक ठरू शकते. भाजपचा संख्याबळाचा आग्रह, शिवसेनेचा स्थानिक पातळीवरील निर्णयाचा आग्रह आणि राष्ट्रवादीची संभाव्य भूमिका यामुळे जिल्हा बँकेच्या अध्यक्षपदाची निवड महायुतीच्या एकजुटीची कसोटी ठरणार आहे.
आता अध्यक्षपदाचा निर्णय जिल्ह्यातील नेत्यांच्या बैठकीत होणार की थेट मुख्यमंत्र्यांच्या राजकीय समीकरणातून, याकडे सहकार क्षेत्रासह संपूर्ण जिल्ह्याचे लक्ष लागले आहे.
