spot_img
spot_img
spot_img
spot_img

जिल्ह्यातील कारखान्यांकडून 3900 रुपये देण्याची तयारी

जिल्हाधिकारी कार्यालयातील बैठकीत दराबाबत सहमती
सातारा/प्रतिनिधीः-
ऊसदराच्या प्रश्नावरून जिल्ह्यात निर्माण झालेला तणाव अखेर निवळण्याच्या दिशेने पाऊल पडले आहे. शेतकरी संघटनांच्या आक्रमक पवित्र्यानंतर जिल्ह्यातील साखर कारखान्यांनी पहिल्या उचलीसाठी प्रतिटन 3 हजार 900 रुपये देण्याची तयारी दर्शविली. जिल्हाधिकारी संतोष पाटील यांच्या अध्यक्षतेखाली झालेल्या बैठकीत हा महत्त्वपूर्ण निर्णय चर्चेतून पुढे आला. त्यामुळे हंगामाच्या सुरुवातीलाच दरावरून निर्माण झालेल्या संघर्षाला तात्पुरता विराम मिळण्याची शक्यता आहे.
गेल्या तीन महिन्यांपासून ऊसदराच्या मागणीवरून शेतकरी संघटना आणि साखर कारखानदार यांच्यात संघर्ष सुरू होता. आंदोलन, निवेदने आणि चर्चेच्या अनेक फेर्‍या होऊनही दराबाबत एकमत होत नव्हते. अखेर मंगळवारी नियोजन भवन येथे झालेल्या बैठकीत या प्रश्नावर सकारात्मक चर्चा झाली. जिल्ह्यातील 17 साखर कारखान्यांचे प्रतिनिधी आणि विविध शेतकरी संघटनांचे पदाधिकारी यावेळी उपस्थित होते.
पहिल्या उचलीचा प्रश्न मार्गी लावताना अंतिम ऊसदराचे गणितही चर्चेच्या केंद्रस्थानी राहिले. साखरेच्या दरातील चढ-उतार विचारात घेऊन आरएसएफच्या 70:30 सूत्रानुसार अंतिम दर निश्चित करण्याबाबत चर्चा झाली. फलटण तालुक्यातील कारखान्यांनीही जिल्ह्यातील अन्य कारखान्यांच्या तुलनेत दरात तफावत ठेवू नये, अशी भूमिका मांडल्याचे समजते.
मात्र, शेतकरी संघटनांनी केवळ बैठकीतील आश्वासनांवर समाधान मानण्यास नकार दिला. जाहीर केलेल्या दराची प्रत्यक्ष अंमलबजावणी झाली पाहिजे, अशी ठाम मागणी करण्यात आली. विशेषतः ऊस वजनातील संभाव्य काटामारी रोखण्यासाठी मूल्यनिर्धारण समितीच्या पॅनलमध्ये शेतकरी संघटनांच्या प्रतिनिधींना सहभागी करून घेण्याचा मुद्दा उपस्थित करण्यात आला.
सर्व कारखान्यांनी आपापले ऊसदर तातडीने जाहीर करावेत, अशा सूचना जिल्हाधिकार्‍यांनी दिल्या. त्यामुळे आता कारखानानिहाय दरघोषणा आणि प्रत्यक्ष बिलातील अंमलबजावणी याकडे लक्ष लागले आहे.

spot_img

Related Articles

ताज्या बातम्या