शहरातील कोविड सेंटरमध्ये महिला पोलीसांची नियुक्ती करा

भाजप महिला मोर्चा आघाडीची पोलिसांकडे निवेदनाद्वारे मागणी : सीसीटीव्ही व रात्रगस्तही सुरू करा, दुर्लक्ष केल्यास राज्यव्यापी आंदोलनाचा इशारा

कराड/प्रतिनिधी :
         राज्यातील अनेक कोविड सेंटरमध्ये महिला अत्याचाराच्या अनेक घटना घडल्या आहेत. त्यामुळे महिलांच्या सुरक्षेचा प्रश्न ऐरणीवर आला आहे. या हे प्रकारे रोखण्यासाठी प्रत्येक कोविड सेंटरमध्ये सीसीटीव्ही कॅमेरे बसविण्यात यावेत. तसेच महिला रुग्णांच्या सुरक्षिततेकरिता त्याठिकाणी 24 तास महिला पोलीस कर्मचाऱ्यांची नेमणूक करून रात्रीच्या वेळेस महिला पोलीसांमार्फत गस्तही घालण्यात यावी, अशी मागणी भाजपच्या महिला मोर्चा आघाडीतर्फे कराड शहराध्यक्ष सीमा घार्गे यांनी वरिष्ठ पोलीस निरीक्षक बी. आर. पाटील यांच्याकडे निवेदनाद्वारे केली आहे.
         सदर निवेदन मंगळवारी 22 रोजी देण्यात आले. यावेळी शहराध्यक्ष एकनाथ बागडी, महिला मोर्चा शहर अध्यक्ष सीमा घार्गे, महिला मोर्चा कराड दक्षिण अध्यक्ष सारीका गावडे, धनश्री रोकडे, सरचिटणीस प्रमोद शिंदे, सरचिटणीस राहुल भिसे, विस्तारक सुनील शिंदे, देसाई आदी. उपस्थित होते. 
        भाजप महिला मोर्चाच्या महाराष्ट्र प्रदेशाध्यक्षा उषा खापरे यांनी नुकतेच पुणे पोलीस आयुक्तांकडे यासंदर्भातील मागणीचे निवेदन दिले होते. त्यानुसार तालुका पातळीवर कराड शहराध्यक्ष घार्गे यांनी सदर निवेदन शहर पोलिसांना दिले आहे.
        या निवेदनात म्हटले आहे की, राज्यात कोरोनाच्या वाढत्या प्रादुर्भावामुळे अनेकठिकाणी कोविड सेंटर सुरू करण्यात आले आहेत. परंतु, अशाठिकाणी महिला अत्याचाराच्या अनेक घटना घडल्या असून त्यांच्या सुरक्षेचा प्रश्न ऐरणीवर आला आहे. या वस्तुस्थितीचा गांभीर्याने विचार करून हे प्रकारे रोखण्यासाठी नगरपालिकेबरोबर योग्य तो संवाद साधावा. व प्रत्येक कोविड सेंटरमध्ये सीसीटीव्ही कॅमेरे बसविण्यात यावेत. त्याचबरोबर सदर कोविड सेंटरमध्ये 24 तास महिला पोलीसांची नियुक्ती करून त्याठिकाणी रात्रगस्तही घालण्यात यावी, असेही या निवेदनात नमूद करण्यात आले आहे. 
         तसेच या मागणीकडे दुर्लक्ष केल्यास भाजपा महिला मोर्चा महाराष्ट्र प्रदेशकडून राज्यव्यापी आंदोलन छेडण्यात येईल, असा इशाराही या निवेदनाद्वारे देण्यात आला आहे.